Konur mótmæla í launamisrétti kynjanna í Sidney, Ástralíu 2010 / AFP

Laun 150.000 starfsmanna í félagsþjónustu í Ástralíu munu hækka um 19% til 41% eftir að dómur féll 1. febrúar síðastliðinn. Verkalýðsfélög leituðu til Fair Work Australia, dómstóls sem tekur á málefnum vinnumarkaðsins og kvörtuðu yfir því að starfsfólk í félagsþjónustu fær greitt lægri laun en starfsmenn í sambærilegum störfum. Áttatíu prósent starfsmanna í félagsþjónustunni í Ástralíu eru konur og verkalýðsfélögin héldu því fram að lág laun í þessum geira væri merki um launamisrétti kynjanna. Ástralía samþykkti árið 1972 lög um launajafnrétti kynjanna.

Ríkisstjórn Ástralíu studdi verkalýðsfélögin í umsókn sinni og lagði til 2 milljarða ástralska dali næstu sex árin til að borga launahækkanirnar. Júlía Gillard, forsætisráðherra Ástralíu, fagnaði úrskurðinum og sagði hann vera „mikla framþróun í átt að raunverulegu launajafnrétti kvenna“. Félög atvinnurekenda hafa sagt dóminn vera „hættulegan“ og að nauðsynlegt sé að koma í veg fyrir að fleiri verkalýðsfélög kæri launamisrétti kynjanna.

Árið 1976 voru samþykkt jafnréttislög á Alþingi þar sem réttur karla og kvenna til sama kaups fyrir jafnverðmæt og sambærileg störf var staðfestur. Þó viðhelst kynbundið launamisrétti hér á landi. Í könnun sem SFR - Stéttarfélag í almannaþjónustu lét gera árið 2011 kom fram að heildarlaun kvenna í fullu starfi eru 24% lægri en hjá körlum og að kynbundinn launamunur í félaginu mælist 13,2%.

Hér er hægt að lesa grein Guðbjarts Hannessonar velferðarráðherra um launajafnrétti kvenna sem birtist í Fréttablaðinu 22. október 2011.

Og hér er hægt að lesa úrskurð Fair Work Australia.

Verið velkomin í fyrsta Þjóðlega eldhús ársins á Hallveigarstöðum (Túngötu 14, í kjallara hússins) á morgun fimmtudaginn, 2. febrúar, kl. 19.00. Að þessu sinni verður matarmenning Indónesíu kynnt.

Allir eru velkomnir að vera með á matarkvöldunum. Vinsamlegast skráið þátttöku í tölvupósti á Þetta tölvupóstfang er varið gegn ruslpóstsþjörkum, Þú verður að hafa JavaScript virkt til að sjá það. .

800 kr. greiðast á staðnum og er í þeim innifalinn matur, kaffi og vatn. Gos og léttvín er hægt að kaupa gegn vægu verði.

Samtök kvenna af erlendum uppruna á Íslandi og Kvenréttindafélag Íslands bjóða upp á Þjóðlegt eldhús, þar sem við eldum saman góðan, framandi og freistandi mat frá mismunandi heimshornum. Kynnt verður ný matargerð, farið í notkun á framandi kryddjurtum og sagt frá matarmenningu ýmissa þjóða í skemmtilegum félagsskap. Konur úr samtökunum kynna landið sitt og menningu í gegnum mat, sögur og myndir. Við hvetjum allar til að taka virkan þátt bæði í undirbúningi réttana og tiltektinni eftir á:)

Verði ykkur að góðu!

Þriðjudaginn 24. janúar verður haldið alþjóðlegt sjálfsstyrkingarnámskeið kvenna í Reykjavík. Women Empowering Women námskeiðið hefur verið haldið í fjölda borgum um allan heim. Námskeiðið hefst kl. 18 og er haldið á Hótel Nordica. Námskeiðið er á ensku.

Women Empowering Women verkefnið hefur það að leiðarljósi að styrkja stöðu kvenna í samfélaginu. Námskeiðin leiða saman konur úr öllum áttum og dreifa þekkingu og reynslu kvenna í stjórnunar- og áhrifastöðum. Meðal þeirra sem tala hér í Reykjavík eru Hafdís Jónsdóttir framkvæmdastjóri Laugar Spa og formaður Félags kvenna í atvinnurekstri, Rúna Magnúsdóttir framkvæmdastjóri Connected-Women.com, Amal Tamimi framkvæmdastjóri Jafnréttishúss, Helga Guðrún Jónasdóttir formaður Kvenréttindafélags Íslands og Kristín Ástgeirsdóttir framkvæmdastjóri Jafnréttisstofu.

Meðal efna sem tekin verða fyrir á námskeiðinu eru:

• The Growth, Power, & Fun of Empowerment
• Finding Your Passion & Turning It Into A Business
• How to Get Fit and Healthy in Simple Ways
• Secrets of a Successful Career Woman
• An Open Discussion on Gender Equality In Iceland & Abroad

Miðaverð er 2.325, og rennur hluti þeirra til íslenskra góðgerðastofnana. Til að skrá ykkur á námskeiðið, hafið þið samband við Þetta tölvupóstfang er varið gegn ruslpóstsþjörkum, Þú verður að hafa JavaScript virkt til að sjá það. og gefið upp nafn og símanúmer.

• Jóhanna Sigurðardóttir, forsætisráðherra
• Steingrímur J. Sigfússon, efnahags- og viðskiptaráðherra og sjávarútvegs- og landbúnaðarráðherra
• Össur Skarphéðinsson,utanríkisráðherra
• Katrín Jakobsdóttir, mennta- og menningarmálaráðherra, og samstarfsráðherra Norðurlanda
• Katrín Júlíusdóttir, iðnaðarráðherra
• Svandís Svavarsdóttir, umhverfisráðherra
• Ögmundur Jónasson, innanríkisráðherra
• Guðbjartur Hannesson, velferðarráðherra
• Oddný G. Harðardóttir, fjármálaráðherra